Ավարտվել է ռուսական «Կուլտուրա» ալիքի «Մեծ ջազ-2022» հեռուստատեսային մրցույթը։ Վերջին օրը՝ եզրափակիչի օրը, մրցեցին մնացած 4 մասնակիցները։ Նրանց թվում է մեր շեփորահար Տիգրան Հարությունյանը՝ Հայաստանի պետական ջազ նվագախմբի մենակատար։
Ժյուրիի կազմում էին Ռուսաստանի ժողովրդական արտիստ Իգոր Բուտմանը, շեփորահար Վադիմ Էյլենկրիգը, դաշնակահար Վալերի Գրոխովսկին և բաս կիթառահար Բիլի Նովիկը։
Եզրափակիչ ելույթում երկու մասնակիցներ՝ Տիգրան Հարությունյանը և տրոմբոնահար և երգչուհի Անաստասիա Իվանովան, հավաքեցին նույնքան միավոր։ Բայց ամբողջ մրցույթի արդյունքներով հաղթող է ճանաչվել ծնունդով Սնեժինսկ քաղաքից Անաստասիա Իվանովան։ Տիգրանը նրանից հետ մնաց ընդամենը 3 միավորով (Իվանովա՝ 190, Հարությունյան՝ 187)։
Տիգրան Հարությունյանը ստացել է մրցույթի մասնակցի դիպլոմը և հատուկ մրցանակ Պյոտր Վոստոկովի Մեծ ջազ նվագախմբի կողմից՝ նվագախմբի հետ համատեղ ելույթի հնարավորություն։
Կայքի խմբագիրները սիրով շնորհավորում են Տիգրանին և մաղթում հետագա հաջողություններ։